曹 仁 超 : 大市短期仲有得升

　　1月2日，週五。恆生指數升655.33，收15042.81；成交305.32億元。1月期指升634點，收15039點，低水。中移動（941） 升4.4％、中國電信（728）升6.2％、中海油（883）升4.8％、中國石油（857）升6％、中國鋁業（2600）升12％及中國神華 （1088）升6.1％。

　 　去年恆指暴跌48％，係1974年以來最大跌幅。去年透過配售新股集資1010億元、公開招股集資532億元及供股集資399億元，即全年集資共 1941億元。恆指平均O由2007年10月最高嘅二十三倍，回落到去年10月最低不足八倍。家嚇嘅八點三倍O，估計喺公佈咗去年業績後將上升到十一倍 （因去年唔少企業純利唔及2007年）。未來股市相信喺恆指平均O八至十二倍之間上落，直到去槓桿化完成為止。

今年策略係保護加進攻

　 　我老曹1974年12月因做緊嘅投資公司自動清盤而失業，幸獲林行止兄邀請由《信報》撰稿員成為《信報》員工。1976年更獲邀認購《信報》股份（投 資 10萬元，兩年前以1500萬元售出），而成為股東及出任董事，開始寫「投資者日記」。至今年紀漸大，如仍然維持每天十二小時工作量，實在不勝負荷，因此 決定今年1月起改為每週只寫一篇，逢週一刊出。去年12月31日辭去公司執行董事一職，但仍擔任董事，以便自己有更多時間做自己喜歡做嘅嘢；同時，可與各 讀者保持每週神交一次。因日後花喺收集資料上嘅時間減少，分析能力能否一如以前？木宰羊。下周開始「日記」將改為「週記」，繼續同各位讀者「見面」。多謝 各位喺過去一段日子全力支持，我老曹以獲得全球最好嘅讀者為榮。

　　展望今年，高盛首席經濟分析師Jim O'Neill估計，今年全球經濟可望溫和復甦，各地股市將從谷底回升，上演亮麗嘅反彈；摩根士丹利公司經濟學家Richard Berner博士估計，今年全球經濟增長幅度唔超過0.9％，係1982年以來全球經濟增速最慢一年；瑞銀則估計，今年全球經濟增長率只有1％。 Berner博士認為，路透貸款定價公司公佈嘅數據顯示，去年美國各大銀行發放貸款總額較2007年大幅下滑55％；信貸緊縮及資產價格下跌係去年衰退理 由，依家去槓桿化仍繼續，進一步資產減記及撥備令信貸響今年仍緊縮，消費下滑風暴至少要去到今年中期。

　　1974年經濟低潮及1982 年低潮係市場缺乏資金引發；呢次剛相反，無論機構投資者、個別投資者，甚至商界都大把資金，依家係無有吸引力嘅投資項 目。形成一旦發現投資對象，大量資金便投入，令股價迅速上升。相信今年內升幅超過50％嘅股份好多，問題係點喺佢地上升之前（或大升前）將佢搵出來。今年 投資策略係一方面保護你嘅財產（不忘止蝕）；另一方面採取進攻型策略。每次經濟出現搵食艱難期，都係發達容易期。家嚇喺money market嘅資金相等於標普五百總市值50％，由此可見市場現金係幾咁充沛（或等入市嘅資金好多）。去年12月美國財政部推出320億美元一個月期國庫 券（接近零利率），仍有1280億美元競投。從呢點睇，呢個熊市二期好長，估計今年全年股市仍處熊市二期，玩個別發展，即炒股唔炒市。

消費業今年受苦

　　2月期油今天回落2.06％或4.6美元，見42.54美元，歐羅兌美元亦回落，因估計歐洲央行減息，今天喺東京見1.4美元及127.14日圓；估計今年上半年年中可見1.2美元；反之，英鎊今天回升多少，見1.4737美元。

　　1月1日起中國取消短期天然氣及煤價管制（上述管制去年1月生效），代表中國政府唔再擔心今年通脹壓力，相信短期內人民幣再減息。

　 　去年上半年商品價格上升令資源股價格有支持。去年7月起商品價格急跌，令路透Jefferies CRB指數全年回落36％，係1956年該指數成立以來跌幅最大一年；標普GSCI指數全年跌幅更達46.5％。如以去年高低差價計，無論原油、黃金、白 金、銅、鋁、錫及鉛等波幅之大皆可以「殺死人」。信用壓碎（credit crunch）所引發嘅全球經濟衰退，結束咗長達六年嘅商品牛市（即2001或02年開始嘅商品牛市，喺去年年中結束）。過去投資者曾希望透過中國、印度 及OECD國家decouple而支持商品價格上升，已證明係分析錯誤；商品大王羅傑斯所宣傳嘅商品超級牛市無法出現！因中國政府欲擴大內需去抵銷出口增 長放緩需時，相信喺2011年前未見功效。原油價格由去年7月147.27美元大幅回落，帶動其他商品價格回落；油價一度見36.94美元，估計今年內亦 好難重返60美元之上。最新數字係美國煉油設施使用率上週減少2.2％，至82.5％，令美國存油上升五十萬桶；美國汽油存量上升八十萬桶。美國汽油零售 價由去年7月每加侖3.631美元回落72.2％，至去年年底每加侖1.008美元；黃金表現好一D，喺去年全年仍升5.4％，以878.2美元收市，但 同3月份1030.8美元比較亦一樣係跌；去年金價上升主因係作為金融避難所之用，而唔係需求上升；白金去年跌幅39.2％，見924.5美元，較3月份 高位2290美元，跌幅好大，令南非礦務公司需減產。基本金屬例如銅下跌54％，去年7月一度見8930美元一噸；鋁下跌36.1％；去年農產品中升幅最 大係可可，上升70.8％，見二十三年新高價；糖升9％。

　　2008年正式結束，去年係美股自大蕭條後跌幅最大一年。2007年11月 當危機開始時，由政府高官至唔少經濟學家都一再保證2008年冇事；去年年 底佢地先話畀大家知有好多問題。我老曹相信1929至32年式大蕭條唔會歷史重演，美國今年或以後經濟表現亦唔係1990至2003年日式衰退，而係介乎 兩者之間。雖然唔少人認為股市喺去年10月（美股去年11月）結束熊市，但我老曹則相信，由去年10月27日起我地進入漫長熊市二期；股市近日上升只係糾 正由去年9月15日起因雷曼兄弟事件所引發嘅六星期過度拋售；相信恆生指數喺可見將來，無法重返雷曼兄弟出事前（即9月15日前）嘅水平；因恆指喺 20000點以上升幅由謠傳港股直通車所引發，呢D只係泡沫；喺可見未來，恆指50天移動平均線無法重返250天移動平均線之上（即確認牛市）；因此，喺 可見將來，股市亦無法出現牛市！至於呢次熊市二期反彈能否收回前跌幅50％？木宰羊。

　　去年中國A股亦喺風風雨雨中度過，下週一A股先 開市。2001年中國加入世貿為美國提供低通脹條件，格蛇乘機減息，令資金湧入美國房地產市場吹起巨大 泡沫；加上投資銀行把金融產品過度衍生化，美國地產泡沫終於喺2006年年中爆破，令CDO市場喺2007年面對壓力。隨住雷曼事件及次按危機蔓延到全 球；家嚇全球金融市場已進入去槓桿化，喺呢個方向唔停止前，令股市變牛市係無法誕生嘅。

　　《福布斯》雜誌公佈，去年世界富豪榜較 2007年財富縮水100億美元以上共二十四名！香港及內地縮水富豪以地產為主，例如碧桂園（2007）嘅楊惠 研縮水140億美元。全球首富股聖畢非德去年亦因巴郡市值下降32％而受影響。股聖接受彭博訪問時話，對佢個人而言一D影響都冇。1974年巴郡股價亦由 每股90美元回落到40美元；1998至2000年跌幅亦達50％，如自己夠長命，相信喺未來嘅日子，巴郡股價可升一倍或以上。

　　去年擁有2.5億美元以上資產嘅美國基金共一千五百九十一隻，但只有六間為股東賺錢！

　 　新加坡宣佈，明年GDP將萎縮2％，出現1965年獨立以來最差一年。去年第四季GDP收縮2.6％，較第三季下降12.5％，第三季較第二季收縮 5.4％，令去年全年GDP只升1.5％及確認進入衰退。今年1月22日政府將提出刺激經濟方案。家嚇建築業係新加坡少數亮點之一，第四季上升 13.3％。

　　英國亦面對八十年代以來最嚴重一次衰退，並估計要到2012年經濟才復甦。

美元滙價可反彈

　 　上週美國三十年期樓按固定利率已重返1971年前水平（5釐），能否阻止美國樓價喺今年進一步下跌？木宰羊。今年中國股市能否出現V形反彈？都係木宰 羊。中國經濟去年先有雪災、再加四川汶川大地震；加上9月份嚟自美國雷曼事件，可以話係內憂外患一齊嚟，令中國經濟出現急降溫，變咗「冰鮮雞」；成個中國 經濟被凍傷了。今年能否迅速復元？今年外圍市況仍面對次按危機，分析界擔心次按危機第二波喺今年3月開始。內地銀行資產負債表仍在衰落，美元滙價10月中 至12月中跌幅達8％，估計今年又再上升。擔心通縮喺美國出現而引發流動性陷阱（liquidity trap），理由係利率無法低於零，而CPI卻可以出現負數，令資本嘅真正成本上升，進一步打擊消費慾及投資欲，進而影響就業率及人均收入。

　 　SOHO中國（410）董事長潘石屹接受《第一財經日報》專訪時認為，一個更美好嘅新世界響摧枯拉朽中產生新嘅萌芽！家嚇SOHO中國持有150億元 人民幣現金，相信係全國現金最多嘅地產開發商。佢唔相信中國城市房屋平均價跌幅將超過30％及相信今年係中國地產尋底年。

　　三十年改革 開放政策令中國由貧窮走上小康。中國由計劃經濟（資源由權力分配，由中央計劃局支配），走向市場經濟（資源由市場決定，而唔受配額限制。再 唔係唔想買嘅嘢充斥商店，想買嘅嘢卻面對配額唔夠），係改革成果。至於開放就係同其他國家做生意，進行國際貿易，互通有無。例如中國造唔到大飛機便向美國 購買，中國以牛仔褲交換，條件係一億條牛仔褲換一架波音客機。呢個係雙方都冇蝕底而係雙贏，中國人因此可以坐飛機（唔係就冇飛機坐），美國人亦可平價買入 牛仔褲，唔使自己生產。以美國生產嘅條件，生產五架飛機較生產一億條牛仔褲便宜。家嚇用一架飛機便換到一億條牛仔褲，結果係雙贏。呢個係中國開放嘅結果。

　 　問題係中國買入一架飛機後可用二十五年，但美國人買入牛仔褲後第二年便要再買，結果美國不斷向中國買牛仔褲，但中國唔使再買飛機，漸漸出現貿易唔平 衡，引發2007年次按危機。美國財長保爾森指出，危機由貿易唔平衡引發。有D國家儲蓄率太高；反之，美國儲蓄率太低。過去中國把出口賺回來嘅外滙用作購 買美債，令美債利率不升反跌，美國人冇因過度消費而令利率上升，直到次按危機爆發才出現急速調整。呢個唔平衡存在嘅時間太長，形成咗呢次調整幅度急且大， 到底要幾耐才完成，木宰羊。

　　去年起中國勞動密集型製造業亦面對其他國家競爭；加上中國人亦唔可以永遠停留響低薪水平，呢個係任何國家 或地區經濟發展必走嘅路，美國、日本、台灣及 韓國都係咁。去年起中國經濟開始由勞動密集型工業轉向高科技產業及服務業，包括零售、地產及金融領域去尋求更高利潤，情況好似八十年代嘅香港，漸漸向低薪 及低技術製造業講再見。家嚇中國經濟正處青黃不接期，即低薪及低技術製造業流失速度快於高科技產業及服務業成長速度，因為遇上美國次按危機。中國結構性調 控需時幾耐先完成？一般估計要三年。

　　1月效應正在發生。因愈來愈多人相信牛市重臨，而忘記熊市二期中反彈幅度最少係前跌幅 31.8％，一般可達前跌幅50％，最多可達61.8％。至今恆 指反彈幅度連50％都未有。即短期仍有力再升。估計今年下半年利率將止跌回升，到時股市先有壓力。去年主要苦難喺金融市場，今年主要苦難喺消費行業；隨住 失業率上升及投資者減債，令消費市場漸感壓力；相信熊市二期中最大一次反彈喺今年首季完成機會好大。

<<轉載自信報>>