金 融 High Tea : 「偉哥市」擋佢者死

港股經上日大升825點後，恆指昨日低開44點，最低跌至15,338點後止跌回升，上午多數時間在15,500點上下窄幅橫行，下午升至全日最高的 15,781點，但高位承接乏力，恆指掉頭回落至打回原形，競價時段中移動(941)被明顯推高，令恆指微升收場。恆指收市報15,614點，上升36 點或0.2%；期指收報15,518點，下跌102點，比現貨低水96點。

國 企指數報8,486點，下跌21點；紅籌指數收市報3,437 點，微跌0.1%，大市成交614億元。重磅股中移動和滙控(005)明顯受壓，尾市才有買盤追入。滙控最低曾見85.35元，尾市回升，收市報 87.25元，下跌0.5%；中移動最低曾見80.25元，到競價時段被推高，倒升0.1%報82.35元。

昨日的大升股票係南航(1055)和東航(670)，佢哋宣佈獲母公司注資後復牌，刺激股價急升，南航升43%，報1.33元，東航升41%，不過升得咁急小心虛火好快燒完。

內地好快滑入通縮

昨日大市出現急升後微調的形態，但對壞消息免疫力幾強，中國公佈11月份CPI(居民消費價格指數)同比上升2.4%，為近22個月最低增幅，亦遠低於市場預期。

內地股市受消息影響而回吐，上證綜指收報2,031點，跌2.3%，這個消息若然係識睇，就真係俾佢嚇親，擔心中國就算掟四萬億救市，都唔知可唔可以保到八，但香港股市基本無反應，國企指數亦只係微跌0.3%，可見港股幾強橫。

股壇叔父話，香港呢啲叫做「偉哥市」，走勢強硬，但有啲人為，唔係太自然；不過大市既然食咗偉哥，短期一定會繼續去，你千祈唔好做攔路虎，否則擋住佢好易死，佢食完偉哥要攞番夠本先收手。

不 過你睇番內地的經濟數據又真係幾得人驚，國家統計局公佈11月份CPI(居民消費價格總水平)同比上漲2.4%，比上月的4%增長急降。內地CPI由去 年下半年開始一路上揚，今年 2月升上最高位8.7%，之後受國家調控物價和經濟減速等因素影響，CPI連續7個月下滑，但到11月跌勢更轉急，估計明年初會出現負增長，即係會出現通 縮，屆時市面情況都幾得人驚。

摩根士丹利最近發佈的一份報告話，中國通貨緊縮的風暴正在暗中積聚力量，它很有可能在09年上半年先來一次通縮衝擊，若沒有強有力的政策推出，在09年下半年及以後有可能轉變為持續通貨緊縮，09年CPI有可能降至-0.8%。

本世紀最佳投資

香港物價很受內地影響，內地通縮，香港亦會通縮，大家唔再擔心經濟過熱，買嘢太貴，但肯定要擔心經濟過冷，甚至出現跳崖式下跌。滙豐預計內地明年第一季出口可能大跌19%，拖累香港出口出現負增長，香港經濟亦好快進入冰河時期。

美國聯儲局行將議息，可能減息0.5釐、甚至0.75釐，香港由於銀行同業拆息已下調，開始有減息空間。滙豐總經理梁高美懿話，銀行存款利息接近零，單方面減借貸利息有難度，佢話唔係一定無得減，但係有難度。

其實滙豐已經一路做緊嘢，等要再減息時維持利潤空間，佢早前已調高新做樓宇按揭利率，而家又加信用卡利息，大幅調高逾期還款利息由26.81釐到31.86釐，大加利息5.05釐。

陸 羽仁見銀行咁樣加信用卡利息，就介紹一個超筍的投資方法俾常用信用卡透支購物的讀者，你地最好的投資，就係一有錢就攞去還信用卡欠款，最好期期清，唔好 只還最低還款數，試問你買乜股可以確保一年有31.86%的回報，兼且絕無風險呢？若果你呢頭用信用卡透支買嘢，嗰頭有錢又攞去炒股，好命時贏10%、 20%，都唔夠俾信用卡利息，唔好命炒股仲要輸埋，咁咪兩頭都輸？所以唔好諗啦，還信用卡欠帳最實際，唔係你就做梗水魚㗎啦！

<<轉載自頭條日報>>