金 融 High Tea : 忘記昨天股價吧！

美股上日持續第二天反彈，加上內地股市在國務院出招後造好，恒指跟外圍高開268點後，即上衝至全日最高點，曾上升近300點，升到13,883點的高 位，之後升幅漸收窄，到11時半開始走弱，跌勢加劇。下午開市，再跟美股期貨下插，最低下滑至13,460點才喘定，尾市略彈，收市報13,509 點，跌78點或0.6%。期指收報13,520點，倒跌25點，比現貨高水11點，成交60,600張。

國企指數微跌5點，報7,227點，大市成交399億元。依家市場炒作一種股票，炒一兩日就完，早前炒起的電力股、建材股，昨日已經急回，炒高咗散戶唔食胡隨時中伏。

昨 日大市繼續軟腳蟹走勢，跟外圍高開後無力上，頂住大市的主要是紅色股，例如重磅股中移動(941)成為保衞大市唔跌咁多的最大原動力，摩根士丹利繼續做 中移動好友，給予中移動目標價80元，評級為「增持」。中移動逆市上升，報73.2元，升幅1.6%，遠遠跑贏大市，佢最高見74.95元，一度升過 4%，下午已經回咗。

滙控歐洲有鑊未爆

相對之下，滙控(005)走勢就幾唔似樣，摩根大通表示滙控屬下滙豐融資在歐洲的 經營業務環境持續惡化，可能會削減派息或實行股息再投資政策，會侵蝕今年 以來跑贏大市的表現，故將滙控目標價由82元下調至72元，重申「減持」評級。滙控以全日最低位收市，收報78.55元，下跌2.2%，拖累大市向下。

有 一個中環茶友係滙控淡友，成日叫朋友唔好成日諗住買大笨象，佢話大笨象過去係好股，英國人管理「相對」審慎，記住只係相對美國人而言，所以爆起鑊來無咁 大鑊，唔一定無鑊，加上滙控近十年靠併購壯大，成為巨企後還能每年維持雙位數增長，就係併購歐洲和美國業務的結果，但「出得來行，預咗要還」，當日賺咗 錢，如今隨時嘔突，滙控美國按揭業務餘毒未清，又到歐洲陷入衰退，佢歐洲業務遲早要撥備，所以唔好期望佢好快好。

茶友話，中投董事長樓繼 偉昨日話，歐美銀行做得唔好就要政府入股，入咗股就攞到最高評級，又倒過頭來搶番無要政府入股的金融機構生意，滙豐正面對這種困 局，生意會十分難做。佢話好多股民成日諗番滙控140幾元的日子，佢叫大家清醒吓，滙控唔係咁易回番到那些股價，先要忘記昨日的高價，然後正視今日去買金 融股的風險。

改壞名銀行執笠

有一個笑話可以同大家分享，美國紐約有間新開的細商業銀行主要服務新移民，本來做得好好地， 但最近都執埋，佢主要係改壞名，因為佢改自己叫做「美利堅合眾 國銀行」(BankofUnitedStates)，聽起上來個名好似美國中央銀行，以前呢個名好掂，特別對美國新移民更殺食，但客戶對嗰名愈大的銀行愈 無信心，紛紛離佢而去，搞到佢瓜咗，呢個笑話係一件真事，由此可見美國市場人心幾弱。

紐約大學教授羅賓尼 (NourielRoubini)以預測今次金融海嘯而聞名，我昨日在《頭條網》的網誌提到佢講的「停滯通縮」(stag- defla-tion)，佢話即使聯儲局減息減到零，加上通縮的負數，實質利率仍然好高；另外你今日借咗錢，因為通縮等如明日要還更多錢，這就叫債務通縮 陷阱，令更多借貸人無力還錢，破產收場，金融機構蝕錢更多，信貸再緊縮。

羅賓尼係淡友，話2009年是通縮和破產的一年。最好的情況是全球政府能快速、合作、非常果斷行事，才可令經濟在2010年恢復，避過漫長的停滯和通縮。

你 睇各國減息減得幾狼，就知風險幾高，紐西蘭儲備銀行早一日宣佈下調基準利率1.5厘，從6.5%下調至5%，已是紐西蘭央行今年第四次減息。瑞典央行仲 勁，將指標利率大幅調低1.75厘，降至2厘，以免生產及就業下滑。以往中央銀行減0.5厘息已經係大手筆，依家一日減1.5厘、減1.75厘，都好似無 事一樣，大家似乎被金融海嘯沖到麻木咗囉，紐元昨日造0.5342美元，喺低位無再大插。

<<轉載自頭條日報>>