金 融 High Tea : 不要希望馬上好

上日美股大幅反彈，恒指昨日跟隨外圍高開193點，上午早段最多曾升逾370點，11點後開始回吐，升幅收窄。恒指午後再跟A股走強，又一次升近高位，之 後又慢慢碌番落去，恒指收市報13,588點，上升183點，升幅1.4%；期指收報13,545點，上升307點，低水43點，成交57,823 張。國企指數收市報7,233點，上升230點或3.3%；大市成交縮減至380億元。

昨日港股好似隔夜油炸鬼，無厘火氣，炒極都炒唔起，上午由美股上升刺激，升完就回，下午內地傳聞有救市措施，所以食完飯下午開市港股又抽高，上證綜指最後報收1,965點，漲4%，但內地收市後港股又回，大市成交又細，成隻軟腳蟹咁款。

內地放水頂硬上

收 市後果然有公布，中央確定9項促進金融經濟發展措施，話溫總理昨日主持召開國務院常務會議，部署促進經濟發展的措施，包括落實適度寬鬆的貨幣政策，促進 貨幣信貸穩定增長；綜合運用存款準備金率、利率、匯率等多種手段，保持銀行體系流動性充分供應，追加政策性銀行今年度貸款規模1,000億元人民幣。

此外，決定加快建設多層次資本市場體系，穩定股票市場運行，推動期貨市場穩步發展，擴大債券發行規模。又話通過購併貸款、房地產信託投資基金、股權投資基金和規範發展民間融資等多種形式，拓寬企業融資渠道。

溫總的措施基本上都係鬆銀根救市，追加1000億銀行貸款可以幫補一下，但市場一直期待的政府設立入市的平準基金，卻仍未見蹤影。

而 家內地或香港股民仍然期望政府救市，跟住股市「馬上好」，呢種期望有少少唔現實，台灣的小馬哥選舉時用了選他「台灣經濟馬上好」的口號，結果後悔到而 家，因為遇上世界性的金融海嘯，亞洲各地的經濟都「馬上不好」，台灣自然唔例外。內地即使真正設立平準基金，短期A股當然會炒一炒，但多數唔能夠馬上見番 個牛市。

財經界大孖沙都唔預經濟會咁快好，摩根士丹利亞太區主席羅奇預計，全球經濟明年有較大機會陷入衰退，要到2010年才會逐漸復甦，至於亞洲地區經濟亦未必可以比歐美地區較早恢復，由於區內經濟主要由輸往西方國家的出口帶動，所以亦很難早於歐美復甦。

有胡唔食罪大惡極

滙 控(005)執行董事兼亞太區主席鄭海泉亦話，預計明年上半年經濟更差，因為金融海嘯帶來的財富損失效應，仍未在歐美經濟反映，未來失業率將進一步上 升，打擊當地消費動力。希望明年下半年經濟可回穩，但很難預測經濟在谷底徘徊的時間，一兩年亦不足為奇。滙控預計明年本港經濟增長1%，較市場預期的負增 長樂觀，佢又話滙控暫無供股集資需要。

羅奇和鄭海泉的睇法都較淡，經濟要一年以上才復甦，如果佢哋睇得啱，即使股市走快經濟半年，可能都仲要等半年以上才見底。

中國投資公司董事長樓繼偉昨日出席研討會時，就好坦白咁話，歐美政府的政策確定性不足，一兩個星期可以大改，加上政府入股了很多經營不佳的金融機構，又可能搶走了經營良好機構的生意，所以中投沒有信心入市買美股。

中 投去年用50億美元入股大摩，如今唔見咗77%，又用30億美元買百事通，又唔見咗85%，心情自然唔好；中投手持2000億美元，出師不利，採取「贏 就谷，輸就縮」的招數，絕對合理。人同此心，心同此理，中投買美股輸錢，新加坡及中東好多主權基金買仲多，輸得仲甘，你估佢哋又有無信心入市呢？呢班大水 喉唔敢入市，縮窒縮窒，我哋都唔好咁快話美股見咗底啦。

大市唔得炒吓消息，內地傳聞報道內地3G年底發牌，並會提升網絡建設需求，中資電 信及相關設備股再起炒風。京信通信(2342)、晨訊(2000)和中國 無線(2369)分別飆升28.9%、36.8%及41.4%。禾雀亂飛，散戶跟炒唔緊要，記住「有胡唔食，罪大惡極」呀。

<<轉載自頭條日報>>