投行籲客戶賭州政府違約

　　12月11日，週四。恆生指數升36.16，收15613.90；成交614.17億元。12月期指跌102點，收15518點，低水，代表恆指喺15781.05遇上阻力。

吊頸都要透嚇氣

　　至今為止，我地玩緊熊市反彈。典型泡沫後嘅反彈維持最長日子係三至六個月，主要係畀大家透嚇氣（吊頸都要透氣啦），然後再跌。股票市場有如貓，響吃掉捉到嘅老鼠前必然玩盡它……。此乃熊市二期。

　 　花旗推介冠捷科技（903），估計今年每股獲利7美仙，減少28.7％，O二點九倍，目標價2.94元。中國海外（688）估計今年每股獲利71仙， 升 24.7％，O十七倍，目標價13.23元。東風集團（489）估計今年每股獲利44.7仙，升2.2％，O四點九倍，目標價3.6元。

　　滬深三百指數跌2.39％，收2046.34。中鐵二局挫6.6％、寶鋼跌3.7％，因11月份鋼材出口較10月份減少36％。東方航空及南方航空漲停板，因獲政府金援。中金黃金及山東黃金升4％以上，因金價漲4.5％，收808.8美元。

　　中共中央政治局委員、廣東省委書記汪洋認為，三十年前中國政府選擇咗市場經濟，帶來經濟快速發展，今天亦因而面對金融危機。

　 　過去中國嘅優勢係廉價土地、人力成本低，加上國際產業轉移而發展起嚟嘅勞動密集型產業；依家面對金融危機，低端生產力嘅弱點暴露無遺。未來只有加快產 業結構調整，妥善安置下崗失業工人，但不能盲目去救落後產業；更應趁機加速淘汰落後產業，促進建設現代產業體系，發揮汰弱留強作用，才係治本之策。

　　中國債券孳息曲線變斜，一年期債券息率跌94點子、十五年期債券息率升18點子。自9月起人行減息，令短期債券息率下降，但長期債券息率則上升。如響OECD國家出現上述情況，代表經濟不久將來會出現衰退。

　 　股市永遠前瞻三至九個月，即明年上半年嘅惡劣環境早喺今年10月27日前反映。11月起，港股反映嘅應係投資界對明年下半年嘅睇法。換言之，明年上半 年點睇已唔重要（股價已充分反映），而在乎明年下半年點睇？中國、印度、歐洲甚至美國都宣佈大搞基建（包括香港），係咪近日鋼鐵股及煤礦股反彈嘅理由？熊 市一期今年10月27日已完成，依家係熊市二期。11月21日並冇跌破10月27日低點，應係浪b，依家行浪c（除非完成1、2、3、4、5，才代表熊市 喺 10月27日死亡）。

明年上半年環境惡劣已反映　　恆指優勢係跌咗三分二之後，即使經濟進一步惡化，股市仍可反彈。喺熊市二期係玩timing而非investing。

　　俄羅斯盧布進一步貶值，今年8月至今俄羅斯失去27％外滙儲備；俄羅斯盧布今天成36.71兌1歐羅，27.93兌1美元，短期仍有貶值壓力。

　　瑞士宣佈減息半釐，至0.5釐。

　　南韓宣佈減息1釐，至3釐，創歷史最低水平，明年上半年將進一步減息。南韓自10月至今已減息四次，利率由5.25釐降至3釐。

　　奧巴馬計劃創造二百五十萬個職位，並宣佈修復三千一百項道路項目……。美國經濟可因此重新恢復增長嗎？唔好自己呃自己啦！

　 　Bailout、bailout再bailout。最近一期《財富》雜誌統計bailout費用已達7萬億美元，即使對GDP達124000億美元嘅 美國而言，亦係一個龐大數字。週二嘅一個月期國庫券拍賣會上，有1200億美元追逐320億美元國庫券，其利率低於半釐！代表銀行根本上唔願向工商界貸 款，寧可買息率不足1釐嘅國庫券。銀行冇理由有錢唔賺㗎，問題出喺邊度？

　　Oppenheimer銀行分析員Meredith Whitney估計，未來十八個月至三十六個月信用卡公司將收縮信用，令消費者信用額下降。佢估計未來住宅樓價再跌20％，後市令人擔心。

　　高盛建議客戶買美國十一個州政府債券信用違約互控（CDS），賭呢D州政府債券違約，無法支付利息。除高盛外，大摩及美林亦建議客戶咁做。

　　估計依家美國有三十一個州喺本財政年度赤字240億美元，有人估計四十多個州已面臨300億美元預算短缺，明年6月600億元，下一財政年度為1200億美元。相信新一輪州政府所發債券無法支付利息潮快將出現！

　　2008年就快過去，2009年展望如何？我老曹相信今年11月起股市已進入熊市二期，即股價因過分低殘而反彈，但客觀環境不斷惡化。

中國保八面對困難

　 　中國11月份入口及出口皆回落，出口回落係2001年6月以來首次、跌幅2.2％；入口跌幅更達17.9％。中國出口嘅都係低檔次產品如玩具、紡織品 及電子、電器產品。入口方面鐵礦石減少7.9％、石油減少1.9％，代表中國原材料入口在下降。汽車銷售11月亦下降10.3％，相信明年中國「保八」有 困難（所指係實際數字，官方公佈嘅數字水分頗高也）。11月份中國入口原油一千三百三十六萬噸，較10月份減少17.3％（較去年11月減少1.8％，去 年 11月入口一千三百六十一萬噸）。估計未來中國出入口進一步惡化，因房地產投資大幅收縮，令鋼材、建材需求急降；通縮風險明年出現。

　 　隨住各國貨幣利率接近零，令利差交易進入unwinding，澳元、紐元、英鎊、歐羅滙價大受影響，日圓滙價則一升再升。利差交易喺2002至07年 好普遍，最大變化係今年6月至10月澳元兌日圓貶值咗三分一，而美元今年7月起上升，因其他國家嘅情況較美國仲差。不過，上述情況唔會長久，估計明年起美 元將再轉弱。

　　新興國家貨幣如巴西、智利、哥倫比亞、捷克、匈牙利、波蘭、俄羅斯、印度、泰國、台灣、南韓、新加坡、菲律賓、馬來西亞皆睇跌。過去呢D貨幣上升，主要係流動性過剩及商品漲價，明年兩大因素皆唔存在。

　　上市企業明年純利續降，上市地產股繼續炒低（因跌幅較房地產快）。商品價格估計明年下半年才回升，油價亦一樣，只有金價短期可能因美元較弱而睇好。

　　2009年係過渡期及整固期，股市主要炒上落市。

　　日常生活中，經常會睇到低收入人士自嘲「無財可理」，放棄通過理財去改善自己生活。幸好1967年夏季我老曹離開中學之後，一早已知道理財嘅重要性──當年月入270元（如以購買力計，相等於今天月入5400元左右）。如果冇理財，今天我老曹會點樣？

　 　開源、節流乃理財嘅最基本原理。為咗開源，我老曹曾一日打四份工：一、喺證券行打工（當時好清閒，股票買賣唔多），月入270元。二、到隔籬印度人經 營嘅洋行打英文信，每封5元。三、晚飯後同別人子女補習英文，每月收入120元。四、同《明報晚報》寫投資稿，每份10元。每天七時半起床到北角送稿，然 後到中環返工（九時前），有空便到隔鄰打英文信（當年仍未有影印機，所有報價單皆由人手打信後寄出），放工後急急腳返屋企沖涼食飯，然後去隔鄰街同別人子 女補習英文，順便諗嚇今天寫乜嘢？晚上九時半回家寫文章，十一時上床睡覺。日日如是，居然可以月入800元。250元畀母親做家用，150元自己用，一年 工夫便有5000元作投資資本了，我老曹就係以呢5000元起家。當遠東交易所成立，嗰位印度人開咗間經紀行，聘用我老曹做出市，月薪一下子由270元升 至 450元，另有佣金可分。其後嗰位印度人漸漸對股票投資產生興趣，我老曹便順便做埋佢投資顧問，每月收入一下子又升到250元。《明報晚報》亦因我老曹嘅 文章受讀者歡迎，每份稿酬由10元加到15元；1970年我老曹已月入1500元！因寫稿關係，另一老闆開投資公司，我老曹便喺二十一歲嗰年做咗投資公司 嘅經理，月入1500元，另加補習收入500元及寫稿收入1000元；1971年已月入3000大元，並因為炒股票，而喺1971年賺到28萬元（點知三 個月內又輸清）！1973年1月我老曹已賺得50萬元有多矣……。

　　有人形容開源節流有如樣子不美嘅淑女，初對之時缺乏吸引力，甚至有 點令人討厭；但愈對得耐，你愈愛上她，最後她會令你走上成功之路。唔好睇小1萬元， 如你好好運用，每次賺取100％回報，只要十次，你已擁有1024萬元！事實上，每年賺取100％回報嘅機會又何其多？如你唔開源節流，點樣獲得第一個1 萬元？如你唔學習投資，又點樣做到得心應手?!萬丈高樓從地起，有邊個唔係由細漸漸做到大？財富唔係從天而降，而係「貝」加「才」。最先嘅「貝」係一分一 毫累積下來，至於「才」係通過不斷學習、不斷失敗，從中吸收返嚟。有咗「貝」，配合自己嘅「才華」，自然發大財。至於「財」為何失去？通常因為「驕傲」與 「自大」。驕傲令你睇唔清前景（Pride comes before failure！），作出錯誤決定。自大令你唔肯承認自己所犯錯誤（我點會睇錯？），讓小錯變成大錯，大錯再變成無可挽回。收起你嘅驕傲，前景立即清晰； 收起你嘅自大，便會承認自己睇錯，睇錯市止蝕，最多虧損本金15％，有乜大問題?!

貝＋才＝財

　　唔少低收入人士每月發下嘅人工，往錢包裡一塞，或者有信用卡數要找，成為「月光」一族（月月用清光），消費與收入相抵，毫無積蓄。既唔開源又唔節流，多D錢便買時裝、化妝品、電子用品或出外旅行，飲飲食食又從唔精打細算，自己窮又可怪誰？

　 　主宰你嘅唔係命運，而係性格！如何收心、如何養性？請嚴守紀律，保持謙卑之心，咁就無往而不利。《論性》一書應係整輯書最後一本，日後亦無乜嘢可以再 教大家。現將《論勢》、《論戰》、《論性》「三書」製成精裝版，供各位收藏之用，希望各位隨勢盛而加入，隨勢落而退出；響過程中學會運用策略，做到攻守有 據，不盲動、不跟風；最後收心養性，做一個嚴守紀律及謙卑嘅投資者。精裝版已喺12月10日晚運抵香港，11日起部分書局有售（因供應量十分有限，第一批 只有二百本，第二批下週一才運到香港出售；全部人手製作，十分精美）。

<<轉載自信報>>